ЕВРОПТ 2026 ОНД ОЙН ТҮЙМЭРТ 616 МЯНГА ГАРУЙ ГА ТАЛБАЙ ШАТААД БАЙНА

Европ даяар ойн түймрийн нөхцөл байдал ноцтой хэвээр байна. Европын Комиссын Хамтарсан судалгааны төвийн (JRC) мэдээллээр наймдугаар сарын 19-ний байдлаар Европт 616,202 га талбай түймэрт өртөөд байна. Энэ нь 2026 оныг Европын сүүлийн жилүүдийн хамгийн хүнд түймрийн улирал болж байгааг онцолжээ.

Испани, Португал, Грек, Франц, Итали, Балканы орнууд төдийгүй Бельги, Герман зэрэг түймрийн эрсдэл харьцангуй бага гэж тооцогддог хойд хэсгийн орнуудад ч томоохон түймэр гарчээ. Бельгийн Hautes Fagnes байгалийн нөөц газарт гарсан түймэр тус улсын түүхэнд бүртгэгдсэн хамгийн том ойн түймэр болж, ойролцоогоор 3,000 га талбай шатсан байна. Испанид долдугаар сарын дунд үеэс сүүл хүртэл хэд хэдэн том түймэр гарч, зөвхөн тухайн хугацаанд ойролцоогоор 140,000 га талбай шатсан гэж судлаачид мэдээлжээ. Түймрийн тархалтыг удаан үргэлжилсэн ган, хэт халалт, хуурайшилт болон хүчтэй салхи улам нэмэгдүүлж байна. Европын Комиссын мэдээллээр хавраас хойш тивийн өргөн бүс нутагт ган гачиг үргэлжилж байгаа бөгөөд есдүгээр сар хүртэл дулаан, хуурай нөхцөл үргэлжлэх төлөвтэй байна.

ЕХ түймэртэй тэмцэхэд харилцан туслалцаа үзүүлж, Бельги болон Испанид онгоц, нисдэг тэрэг, гал сөнөөгчдийг илгээжээ. Одоогоор ЕХ-ны Иргэний хамгаалалтын механизмыг долоон улс ойн түймэртэй тэмцэх зорилгоор ашигласан байна.