ЕХ ГАЛТ ТЭРГЭЭР ЗОРЧИХ ТАСАЛБАР ХУДАЛДАН АВАХЫГ ИЛҮҮ ХЯЛБАР БОЛГОНО

Европын Комисс 2026 оны тавдугаар сарын 13-нд Европ даяар галт тэргээр зорчихыг илүү хялбар болгох шинэ дүрмийн төслийг танилцууллаа. Энэхүү өөрчлөлт нь ялангуяа олон улсын болон хэд хэдэн компанийн галт тэргээр дамжин зорчдог хүмүүст чиглэж байна.

Шинэ дүрэм хэрэгжвэл зорчигчид нэг л сайтаас эсвэл апп-аас хэд хэдэн галт тэрэгний компанийн тасалбарыг нэг дор захиалах боломжтой болно. Өөрөөр хэлбэл, улс дамнасан аялал хийхдээ тасалбар бүрийг тусад нь авах шаардлагагүй болно гэсэн үг.

Мөн галт тэрэг хоцорч, дараагийн унаандаа амжихгүй болсон тохиолдолд зорчигчид:

• өөр маршрутаар үргэлжлүүлэн зорчих,

• төлбөрөө буцаан авах,

• нөхөн олговор авах,

• шаардлагатай тусламж үйлчилгээ авах эрхтэй болно.

Тасалбар борлуулах платформууд аяллын мэдээллийг шударгаар харуулах үүрэг хүлээх бөгөөд боломжтой үед нүүрстөрөгчийн ялгаралт багатай чиглэлийг онцлон харуулах шаардлага тавигдана. Мөн 2025 онд хийсэн судалгаагаар европчуудын гуравны хоёр нь галт тэрэгний тасалбар захиалах процесс хэт төвөгтэй учраас аяллаасаа татгалзаж байжээ. Зарим тохиолдолд галт тэрэгний тасалбар авахад онгоцны тасалбараас дунджаар 70 хувиар илүү хугацаа зарцуулдаг байсан байна.

Мөн Иранд үүссэн дайны улмаас онгоцны түлшний үнэ огцом өсөж, нислэгийн үнэ нэмэгдсэн нь Европыг галт тэргийг илүү бодит хувилбар болгоход түлхэц өгчээ. Одоо энэхүү санал ЕХ-ны Зөвлөл болон Европын Парламентын хэлэлцүүлэгт орно. Хэрэв батлагдвал галт тэрэгний компаниуд системээ шинэчлэхэд нэг жилийн хугацаа өгөхөөр төлөвлөжээ.