ДЭЛХИЙ ДЭЭР НҮБ-ИЙН ГИШҮҮН 193 УЛС, АЖИГЛАГЧ 2 ОРОН ОРШИЖ БАЙНА

Одоогийн байдлаар дэлхий дээр нийт 195 улс байдаг. Үүнд НҮБ-ийн 193 гишүүн орон болон ажиглагч статустай Палестин болон Ватикан багтдаг.

Гэвч олон улсын улс төрийн нөхцөл байдал, бүс нутгийн мөргөлдөөн, тусгаар тогтнолын хөдөлгөөнүүдийн улмаас ойрын ирээдүйд энэ тоо өөрчлөгдөх магадлал бүрэн байсаар байна.

Сүүлийн жишээ бол Өмнөд Судан бөгөөд 2011 онд Судан-аас салж, дэлхийн хамгийн залуу тусгаар улс болсон. Энэ нь шинэ улс бий болох боломж бодитоор оршсоор байгааг харуулсан томоохон үйл явдал байв. Өнөөдөр ч хэд хэдэн бүс нутагт тусгаар улс болох хүсэл, улс төрийн хөдөлгөөн идэвхтэй үргэлжилж байна. Тухайлбал, Тайвань нь бие даасан засаглалтай ч бүрэн хүлээн зөвшөөрөгдөөгүй хэвээр байгаа бол Палестин олон улсын хэмжээнд тусгаар улс болохын төлөө тэмцлээ үргэлжлүүлж байна.

Мөн Европт Каталони (Испаниас), Шотланд (Их Британиас) салж тусгаар улс болох асуудал үе үе сөхөгддөг. Харин Ойрхи Дорнодод Курдистан гэх мэт өөрийн улс байгуулах хүсэлтэй ард түмэн олон жил тэмцсээр байна.

Гэсэн хэдий ч шинэ улс бий болох нь маш төвөгтэй үйл явц хэвээр байна. Учир нь олон улсын хүлээн зөвшөөрөл авах, улс төрийн тогтвортой байдал хангах, эдийн засгийн бие даасан байдал бүрдүүлэх зэрэг олон хүчин зүйл шийдвэрлэх нөлөөтэй. Ялангуяа НҮБ-д гишүүнээр элсэхийн тулд дэлхийн томоохон гүрнүүдийн дэмжлэг зайлшгүй шаардлагатай байдаг.