ТРАМП КАНАД БОЛОН ЕВРОПЫН ХОЛБООНЫ ШИНЭ ТҮНШЛЭЛИЙГ ЭСЭРГҮҮЦЭВ

Канад улс Европын Холбоотой харилцаагаа урьд өмнө байгаагүй түвшинд гүнзгийрүүлэх боломжийг хэлэлцэж эхэллээ. Европын Комиссын ерөнхийлөгч Урсула фон дер Ляйен Канад улсыг ЕХ-ны анхны “түнш гишүүн” (associate member) болгох шинэ хэлбэрийн харилцааг санал болгосон бөгөөд энэ нь одоогоор ЕХ-ны албан ёсны гишүүнчлэлийн ангилалд байдаггүй шинэ статус юм.

Канадын Ерөнхий сайд Марк Карни 9-р сарын 17-нд Страсбург дахь Европын парламентад үг хэлэхдээ уг санааг “ирээдүйн төлөөх холбоо” хэмээн нэрлэж, Канад улс Европтой харилцаагаа стратегийн түвшинд бэхжүүлэх сонирхолтой байгаагаа илэрхийлэв. Тэрээр Канад улс ЕХ-нд бүрэн гишүүнээр элсэхийг зорихгүй, харин худалдаа, батлан хамгаалах үйлдвэрлэл, чухал ашигт малтмал, хиймэл оюун ухаан, эрчим хүч, сансар болон санхүүгийн салбарт хамтын ажиллагаагаа өргөжүүлэхийг хүсэж байгааг онцолсон байна.

Гэвч энэ санаа АНУ-ын Ерөнхийлөгч Доналд Трампын зүгээс эрс хариу үйлдэл дагуулжээ. Трамп Канадын ийм харилцааг ЕХ-той байгуулах нь “дайсагнасан үйлдэл” гэж үзвэл Европын бараа бүтээгдэхүүнд “маш өндөр тариф” тогтоох, тэр байтугай Европтой хийдэг худалдааг хязгаарлах арга хэмжээ авч болзошгүй гэж мэдэгдсэн байна. Тэрээр мөн уг саналыг “инээдтэй” хэмээн тодорхойлжээ.